கேலக்ஸியின் ஆண்டு விழாவும் புத்தக வெளியீடும்

வணக்கம்.

கேலக்ஸி பதிப்பகத்தின் ஐந்தாம் ஆண்டு , விண்மீன் மின்னிதழின் இரண்டாம் ஆண்டு தொடக்க விழா மற்றும் இரண்டு புத்தக வெளியீடுகள் என சென்ற சனிக்கிழமை (20/06/2026) மாலையை சிறப்பாக்கிய நிகழ்வு துபையில் ஜெசிலா மேடத்தின் ‘Proactive Excel Safety Consultancy’ நிறுவனத்தில் நடைபெற்றது.

நம் மனசுக்குப் பிடித்த, நெருக்கமான, நாமும் சேர்ந்து பயணிக்கக் கூடிய ஒரு நிறுவனத்தின் நிகழ்வு என்பது எப்போதும் மகிழ்ச்சி தரக்கூடியது அல்லவா..? அந்தச் சந்தோஷத்துக்கு நிகரான சந்தோஷம் வேறு ஏது? கலந்து கொண்ட அனைவரும் நம் விழா என்ற மகிழ்வோடு விழாவினை நிறைவு செய்தோம்.

கேலக்ஸியின் நிகழ்வினை எப்போதும் போல் தனது நகைச்சுவைப் பேச்சோடு தொகுத்து வழங்கினார் கலைஞன் நாஷ். அரசியல் நகைச்சுவைகளை ஆங்காங்கே தூவினாலும் அது முழுக்க முழுக்க வஞ்சப்புகழ்ச்சிதான் என்றாலும் அதையும் தாண்டி ரசிக்க முடிந்தது. ஒவ்வொருவரையும் அழைக்கும் போது சின்னச் சின்ன நகைச்சுவையைத் தூவுவதில் கில்லாடி. எண்பதைக் கடந்த காப்பியக்கோ அவர்களை அண்ணன் என்றழைத்ததுடன் அவரின் திருமதியை அண்ணி எனச் சொல்லி அவையை மகிழ்வித்தார்.

எப்பவும் போல் தனது பேச்சால் எல்லோரையும் மகிழ்வித்து, வரவேற்றார் திராவிடப் போர்வாள் பிலால் அலியார். மாதரசியை மதராசி என வாசித்ததாய்ச் சொல்லி அரங்கை சிரிக்க வைத்தார். ஒவ்வொருவரையும் வரவேற்ற விதமும் சிறப்பு.

கேலக்ஸியின் ஐந்தாம் ஆண்டு பயணத்துக்கு தனது வாழ்த்துக்களைப் பகிர்ந்து கொண்ட சகோதரர் அபுல் பைஸ், கதை பேசலாம் வாங்க எனத் தாங்கள் வார இறுதியில் கூடிப் பேசியதன் மூலம் அதிகம் வாசிக்க முடிந்தது என்று சொன்னார்.

எழுத்தாளர் மதுமிதா அவர்கள் எழுதிய ‘கை தொழும் தேவதை’ என்னும் நூலினைப் பற்றிய அறிமுக உரையை பாலாஜி பாஸ்கரன்  மிகச் சிறப்பாகச் செய்தார். முதல் பிரதியை எழுத்தாளர் ஜெசிலா  வெளியிட தொழிலதிபர் அபுதாஹிர் அவர்களும், இரண்டாம் பிரதியை  திலீப் வெளியிட குழந்தைகள் இதய அறுவைச் சிகிச்சை நிபுணர் மருத்துவர் பெனடிக்ட் அவர்களும் பெற்றுக் கொண்டார்கள். இந்தப் புத்தகத்தில் மூன்று சிறப்பான குறுநாவல்கள் இருக்கின்றன. மூன்றுமே அம்மாவைப் பேசுவதாய் இருப்பது மேலும் சிறப்பு.

நான் எழுதிய ‘மாதரசி’ என்னும் சிறுகதைத் தொகுப்புக்கான அறிமுக உரையை எழுத்தாளர் ஜெசிலா வழங்கினார். எல்லாக் கதைகளையும் உள்வாங்கிப் படித்து மிகச் சிறப்பான உரையைக் கொடுத்தார். முதல் பிரதியை இலங்கையின் மிகச் சிறந்த மூத்த எழுத்தாளர், ஐயா காப்பியக்கோ ஜின்னாஹ் ஷரிபுத்தீன் அவர்கள் வெளியிட, திருமதி. தேவதர்ஷினி பாலாஜி அவர்களும், இராஜாராம் வெளியிட தொழிலதிபர் அபுதாஹிர் அவர்களும் பெற்றுக் கொண்டார்கள். இந்தத் தொகுப்பில் இருக்கும் பனிரெண்டு கதைகளும் பெண்களின் பெயரில் இருக்கும் என்றாலும் பெரும்பாலும் அப்பெண்களைப் பற்றி ஆண்கள் பேசுவதாய்த்தான் கதை நகரும்.

இந்நிகழ்வுக்குப் பின்  உரை நிகழ்த்திய தொழிலதிபர் அபுதாஹிர், தனக்கு இருந்த மன அழுத்தத்துக்கு மருந்தாய் அமைந்தது, ஞாயிறு மாலையில் நடக்கும் ‘கதை பேசலாம் வாங்க’ நிகழ்வில் கலந்துக்கங்க என்று சொன்னார். தான் எப்படி அங்கு வந்து கதை சொல்ல ஆரம்பித்தேன் என்பதையும் எழுத்தாளர் சல்மாவின் கதைகள் எதனால் தன்னை ஈர்க்கின்றன என்பதையும் சொன்னார்.