கறுப்பி

கறுப்பி

– சதீஷ்குமார்

புலம்பெயர் வாழ்க்கையின் நிழல் உலகத்தையும் பெண்களின் மீதான சுரண்டலையும் வெளிச்சமிட்டுக் காட்டும் ஓர் நல்ல படைப்பு.

எழுத்தாளர் பரிவை சே.குமார் அவர்களின் படைப்புகள் பொதுவாக கிராமத்து மண்ணின் மணமும், மனிதர்களின் இயல்பும், சடங்கு சம்பிரதாயங்களும், கலாச்சார மரபுகளுமே பிரதானமாக கொண்டிருக்கும், ஆனால் இந்தக் ‘கறுப்பி’ நாவலில் அவர் தனது வழக்கமான பாணியில் இருந்து முற்றிலும் மாறுபட்டு, தன்னை முற்றிலும் ஒரு மாறுபட்ட எழுத்தாளராக அடையாளப்படுத்தியுள்ளார்.

அபுதாபியில் பேச்சுலராக வாழும் சிவா என்ற இளைஞனை மையமாகக்கொண்ட ஒரு எதார்த்தமான, சிந்திக்கத் தூண்டும் கதை. வெவ்வேறு குணங்களும், தீவிர காமவேட்கையும் கொண்ட நண்பர்களுடன் ஒரு சிறிய அறையைப் பகிர்ந்து கொண்டு வாழும் சிவா, தன்னைச் சுற்றி நடக்கும் கொடூரமான உண்மைகளை அமைதியாகக் கவனிக்கும் ஒரு சாட்சியாக மாறுகிறான்.

இந்நாவல் புலம்பெயர்ந்து பாதிப்புக்குள்ளாகும் பலரின் வாழ்க்கையை ஒன்றாக இணைக்கிறது. தன் அந்தரங்கமான பாலியல் உணர்வுகளையும், ரகசியங்களையும் சிவாவிடம் பகிர்ந்து கொள்ளும் அவனது சக பெண் ஊழியர் லீமா; ஹோட்டல் வேலை என்று சொல்லி, பாலியல் தொழிலில் தள்ளப்பட்டு, பின்னர் வீட்டுப் பணியாளராக முதலாளி மற்றும் அவரது மகன்களால் சுரண்டப்படும் யமுனா; உள்ளூர் ஷிஷா கடையில் வேலை செய்து, வாடிக்கையாளர்களால் தொடர்ந்து பாலியல் அத்துமீறலுக்கு ஆளாகும் கறுப்பினப் பெண்ணான மலாமா என்ற மூன்று பெண்களின் வாழ்க்கையைப் பேசியிருக்கிறது.

தன்னைச் சுற்றியுள்ள மனிதர்கள் பெண்களை வெறும் போகப் பொருளாகப் பார்ப்பதைக் கண்டு சிவா அடையும் கவலையும் ஏமாற்றமும், இந்தச் சமூகம் விளிம்புநிலை பெண்களை மனிதர்களாகப் பார்க்காமல் ஆண்களின் இன்பத்திற்கான பொம்மைகளாக மட்டுமே நடத்துவதை மிகக் கடுமையாக விமர்சிக்கிறது.

ஆண் அறைத் தோழர்கள் மற்றும் அலுவலக ஊழியர்களுக்கு இடையே நடக்கும் எவ்வித வடிகட்டலும் இல்லாத இயல்பான பேச்சுக்களை ஆசிரியர் வெளிப்படையாகப் படம் பிடித்துக் காட்டியிருப்பது இப்புத்தகத்தின் மிகப்பெரிய பலங்களில் ஒன்றாக நான் நினைக்கிறேன். தன்னை சுற்றி உள்ள பெண்களை வெறும் காமக் கண்ணோட்டத்துடன் மட்டுமே பார்க்கும் அறைத் தோழர்களின் வேட்டை மனப்பான்மையையோ அல்லது அவர்களின் அநாகரிகப் பேச்சுக்களையோ ஆசிரியர் மறைக்க முயலவில்லை. இந்த உரையாடல்களை அப்படியே வெளிப்படுத்துவதன் மூலம், வெளிநாடுகளில் உள்ள பேச்சுலர் அறைகளில் நிலவும் தனிமை, நச்சுத்தன்மை வாய்ந்த சூழல் மற்றும் ஒழுக்கச் சீரழிவு ஆகியவற்றை இப்புத்தகம் துல்லியமாகப் படம்பிடித்துக் காட்டுகிறது.

இன்றைய உலகளாவிய புலம்பெயர்தல் பிரச்சினைகளுக்கு கறுப்பி மிக நெருக்கமானதாக இருக்கிறது. வளரும் நாடுகளில் இருந்து ஆயிரக்கணக்கான பெண்கள் தங்கள் குடும்பங்களை பொருளாதார ரீதியாக உயர்த்துவதற்காக ஆண்டுதோறும் பிற மத்திய கிழக்கு நாடுகளுக்கு புலம்பெயர்கின்றனர். ஆதரவளிக்க யாரும் இல்லாத வெளிநாட்டுத் தனிமை, பொருளாதார ரீதியாக ஆதரவற்றவர்களாகவும், எளிதில் சுரண்டக்கூடியவர்களாகவும் பார்க்கும் ஆண்களின் ஆணாதிக்க மனநிலை ஆகியவற்றின் நிஜ உலக அவலங்களை இப்புத்தகம் பிரதிபலிக்கிறது.

இப்புத்தகத்தின் மிக நெகிழ்ச்சியான பகுதி அதன் இறுதிப் பக்கங்களாகும். கதையின் முடிவில், சிவா தான் சந்தித்த மற்றும் தன் வாழ்வில் கடந்து வந்த அனைத்துப் பெண்களையும் (மனைவி, லீமா, யமுனா மற்றும் மலாமா) ஒரே தட்டில் வைத்து, ஒரே அளவுகோலால் ஒப்பிட்டுப் பார்க்கிறான்.

இங்கு சிவா எல்லைகள் கடந்து, நாடு, இனம், மதம் ஆகிய பாகுபாடுகளைக் கடந்து, அவர்கள் அனைவருக்கும் சமமான முக்கியத்துவத்தை வழங்குகிறான். பெண்ணாகப் பிறந்த அனைவரும் ஏதோ ஒரு வகையில் சந்திக்கும் துயரத்தை ஒரே நேர்கோட்டில் நிறுத்தி, அவர்களுக்கான நீதியை அவன் கோருகிறான். சிவாவின் மனதைக் குடையும் மிக முக்கியமான கேள்வியை நம்முன் விட்டுச் செல்கிறது இந்நாவல்.

இப்புத்தகம் யதார்த்தத்தை நோக்கிப் பயணித்தாலும், ஒரு குறிப்பிட்ட விஷயம் சற்று முரணாகத் தெரிகிறது. சிவாவிற்கும் அவனது சக ஊழியர் லீமாவிற்கும் இடையே உள்ள உறவுமுறை நம்பகத்தன்மையின் எல்லையைத் தாண்டுகிறது. லீமாதன் உள்ளாடைகளின் நிறம் முதல் தன் வெளிப்படையான பாலியல் ஆசைகள் வரை அனைத்தையும் ‘தூய்மையான நட்பு’ என்ற பெயரில் சிவாவிடம் தொடர்ந்து பகிர்ந்து கொள்கிறாள்.

தன்னைச் சுற்றியுள்ள பெண்கள் பாலியல் ரீதியாக மட்டுமே பார்க்கப்படுவதைக் கண்டு ஆழமாக மனமுடையும் ஒரு கதாநாயகன், லீமாவின் இந்த அதீத பாலியல் பேச்சுக்களில் அமைதியாகப் பங்கெடுப்பது முரண்பாடாகத் தோன்றுகிறது. அவர்களின் உரையாடல்களில் உடல் தோற்றம் மற்றும் பாலியல் ஆசைகள் பற்றியே தொடர்ந்து பேசுவது திணிக்கப்பட்டது போல் உள்ளது. கதையின் சமநிலையையும் கதாநாயகனின் குணாதிசயத்தையும் தக்கவைக்க இதை தவிர்த்திருக்கலாம் என்று தோன்றுகிறது.

நாம் இந்த நாவலைக் குறித்து ஒரு விமர்சனக் கூட்டம் அல்லது உரையாடல் நிகழ்த்த வேண்டும். கறுப்பி (மலாமா) எடுக்கும் முடிவு, யமுனாவின் சமரசத் தன்மை, லீமாவின் பரஸ்பர நம்பிக்கை ஆகியவற்றைக் குறித்துப் விவாதித்தால் நமக்கு இதில் ஒரு தெளிவும், விரிவான விளக்கமும் கிடைக்கலாம்.

கறுப்பி மூன்று பெண்களின் வாழ்க்கையைப் பேசும் நாவல்.

*****